jueves, 30 de septiembre de 2010

Carrexón

Fermoso posado dun carrexón có culeiro cheo de tinto e o molido ó lombo, exactamente na rúa de San martiño da vila, diante da tenda que penso que era da "Contempala" (corrixídeme se me trabuco) que amosaba un bó surtido de escobas e caixas de galletas Cuétara.
Esta foto supoño que terá bastante relación cunhas que publicamos o ano pasado por estas datas, e que podedes ver pinchando aquí.
Naquela ocasión deixaron algúns comentarios, nos que se falaba de que estas uvas eran para a adega de José Escudero. Si sabedes algo máis, escribideo.




miércoles, 29 de septiembre de 2010

Coa vendima a voltas

Destas fotos si sabemos algo. Que se fixeron nunha viña que hai á esquerda da vía do tren, baixando polo camiño que vai á Barca. A finca en cuestión tiña adega propia, nunha pequena casa, e é alí onde se dirixen estes carrexóns, que saen na foto, á depositar as uvas.
Ó fondo podedes ver o río Miño, e a casa dos barqueiros que estaba ó outro lado do río.




martes, 28 de septiembre de 2010

Vendimando

Seguimos con estas fotos que tiña en reserva, coma un fondo de armario, sobre as vendimas no Ribeiro. Vemos nesta a unha vendimota provista do seu caldeiro ante unha cepa ben cargada de tinto. Como sucede con esta serie de fotos, non sei onde se fixo, pero tampouco tenvos maior importancia, para calqueira lugar onde miredes veremos unha estampa así.



domingo, 26 de septiembre de 2010

Melón

Como podedes ver non me esquencín de D. Francisco Pons Sorolla, o arquitecto que levou a cabo as primeiras actuacións de restauración no casco vello da vila, e hoxe poñemos un plano feito por el do ábside da abadía cisterciense do noso veciño pobo de Melón, onde tamén estivo el dirixindo as obras de acondicionamento máis ou menos na mesma época que as de Ribadavia.
Foi neste mosteiro onde se rodou parte das esceas da pelicula Cotolay no ano 1965. Transformaron a súa fachada na da Catedral de Santiago, mediante uns decorados espectaculares para aquela época, tal como podemos apreciar na segunda foto. Lembro que ata tiveron que intervir os bombeiros de Ourense para facer chuvia artificial que imitase unha treboada. É unha magoa que non conservemos máis documentos gráficos desta rodaxe, tanto de Melón como da nosa vila.


viernes, 24 de septiembre de 2010

Nenas en San Xoan

Estas dúas nenas que traemos hoxe ó blog están fotografiadas na Praza de San Xoan, xusto nos soportais que hai na imprenta do Ribadaviense, e xusto tamén, enfronte de onde vivían.
Son Carmela e Rita Dávila, fotografiadas por Polito, que tiña unha pequeña tenda nun calexón da mesma praza.
Polito, e máis o fillo da farmacéutica eran uns grandes afeccionados á fotografía. Tiñan un pequeno laboratorio, e lles facán moitas fotos a tódolos nenos do barrio. Esta en concreto debe de ser de finais dos anos 60.


Pasaron moitos anos dende aquela, e mirade vós por onde, Carmela está feita unha excelente fotógrafa, que inaugura hoxe mesmo unha exposición adicada ó Ribeiro na Tapería " O Rincón do Viño", na rúa Mera Soto da vila.
Alí estarán colgadas as súas fotos, ata finais de Outubro. Debaixo vós deixo o cartel que anuncia a exposición, e vola recomendo vivamente, ó igual que xa vos recomendei algunha vez visitar o seu fotoblog, ó que podedes acceder pinchando aquí.


jueves, 23 de septiembre de 2010

Outros nenos

Non sei quen son, pero ó mellor algún de vós cae na conta, e nos pode dicir algo. Son xente da vila, ou dos arredores, e non sei que faena fan, supoño que rozar o monte para obter estrume para algunha meda, ou para a cama dalgunha besta, xa que polo que parece, o que portan entre as mans son xestas, pero ide vós a saber...
Non teño máis datos polo que se aceptan todo tipo de suxestións.


martes, 21 de septiembre de 2010

Preparando as cubas

Estamos a piques de comenzar as vendimas, que son o colofón a un ano cheo de traballos e desvelos, a un ano de agarimos ás cepas e ás vides, e que agora, case coa chegada do Outono vai dar os seus froitos.
Para acompañar esta laboura tradicional do noso Ribeiro, irei poñendo neste mes unha serie de fotos, que quizais recoñezades, xa que son as complementarias á serie que puxemos o ano pasado. Aínda que son moi parecidas penso que non repetirei ningunha.
A primeira é esta, que non sei onde está feita. Podería ser en Sampaio, nas Chavolas ou en Francelos. O caso é que as tiña meu pai gardadas, e debeb de estar feitas a finais dos anos sesenta. Acaenos de marabillla para ilustrar as preparacións que se facían antigamente nas adegas do Ribeiro. No mes de Setembro, foras por onde foras, en calqueira recuncho da nosa bisbarra, atopabas esceas coma esta. A xente tratando de poñer todo a punto para a colleita, para o esforzo final. O de facer o viño é outro conto, e virá despois, primeiro hai que meter as uvas nas cubas.




domingo, 19 de septiembre de 2010

Na emigración

Outra excepcional testemuña que nos envía Francisco Couto. Concretamente trátase dunha foto na que aparece xente de Ribadavia que andaba a traballar no extranxeiro, na emigración. Aparece no medio dos cinco Filiberto Soto, que era moi amigo do seu pai, que tamén se chamaba Francisco Couto, e que é o que está situado á súa esquerda. O primeiro pola dereita pensa que pode ser un irmán de Filiberto pero non o pode asegurar. Dos outros dous non se acorda, xa que naqueles tempos el era moi pequeno. De Filiberto acórdase ben, e ten del mois bós recordos, xa que tiña moita relación coa súa familia. A foto está fechada o vintedous de Febreiro de 1956, e está feita en Caracas ( Venezuela) moi preto de onde Filiberto tiña o seu negocio, que era unha xestoría.



viernes, 17 de septiembre de 2010

Un rapaz da vila

Outra desas fermosas fotos coas que nos obsequiou Ruth Matilda Anderson. Neste caso, e segundo o libro da súa exposición, esta foto sacouse en Ribadavia no mes de Xullo do ano 1925. Polo tanto este rapaz, que supoño que debeu de ser veciño noso, hoxe en día, si vivira, tería polo menos uns 95 anos.
Unha das cousas a ter en conta, é o interés desta fotógrafa norteamericana polos costumes dos galegos. Así vemos como o rapaz posa cun "molido"(non sei si se lle chama así). Ese atado feito en palla que usaban para apoiar os culeiros nos ombros, nun mes en que estes elementos estaban gardados nas adegas á espera das vendimas. Non é casualidade a foto, senón que está preparada a conciencia para ensinar a nosa forma de vida naqueles anos.
Non sei quen é o protagonista, nin o lugar concreto onde se fixo. Si tendes algunha idea, comentadea.



miércoles, 15 de septiembre de 2010

¿Coñecedes a alguén máis?

Esta é outra desas maravillas que nos está a enviar Antonio Canitrot. Nun dos seus correos me comenta que esta foto ten tódalas trazas de corresponder a una boda celebrada en Ribadavia, e que está datada no mes de Santos do ano 1925.

Como vedes levou un gran traballo outra vez para numerar os personaxes invitados a esta celebración, pero só é capaz de identificar a seis deles:

Nº9-Ramona Fariña Juste

Nº11-Elisa Gómez Juste

Nº12-Secundino Gómez Juste

Nº18-Amelia Fariña Juste

Nº20-Josefa Gómez Juste

Nº22-Isaura Gómez Juste

Agora é o voso turno. A ver se entre todos somos quen de recoñecer a alguén máis. Esperamos os vosos comentarios.


domingo, 12 de septiembre de 2010

Comenza o curso, e de volta a Tuy

Comeza outra vez o curso, e os que estudiaban naqueles tempos tiñan que facelo fóra da vila, xa que en Ribadavia non había onde facelo.
O que está no medio do quinteto de atrás é Manuel Lage, do que xa puxemos outras fotos, como aquela na que portaba o San Telmo de Tuy nunha procesión. Aquí o temos fotografiado na mesma localidade cuns compañeiros de estudios do Seminario. El nunca rematou os estudios sacerdotais, pero ó mellor algún dos que aparece nesta foto chegou a obispo. Vai ti a saber.




viernes, 10 de septiembre de 2010

A nosa patroa

Hoxe subimos esta foto antiga da Virxe do Portal que nos enviou fai un tempo Carmela Dávila.
Non sei en que ano se sacaría, pero quero que sirva coma unha pequena homenaxe deste blog ó fervor e á devoción que lle amosamos tódolos veciños da vila e do Ribeiro.
Xa sei que xa pasou o día 8, pero máis vale tarde que nunca.
Outro ano máis, por motivos que non veñen ó caso, non poderei estar na vila. Tomade un viño e botade un baile á miña saúde.



miércoles, 8 de septiembre de 2010

Festas do Portal do 1963

A vila arde en festas, e é unha mágoa que non teñamos unha colección cos carteis antigos que as anunciaban ano tras ano. O que si teño son algúns programas de man, dos que penso que xa publicamos algo, e dos que haberá que publicar máis.
De tódolos xeitos, aquí tedes un que atopei en Flickr. É un cartel das Festas do Portal do ano 63 subido por "Bertez" a Internet, ó mesmo que aquel cartel da Orquesta "Novos Ritmos" de Leiro. Supoño que as debe conservar por estar feitas na imprenta Roel da Coruña.
Si sabedes de algunha colección ou de xente que os teña, fotografiadeos e non deixedes que se perdan ou apodrezan nalguha parede, E xa sabedes onde estamos.
Disfrutade das festas.




domingo, 5 de septiembre de 2010

Voda en San Francisco

Esta é unha desas fermosas fotos que tanto vos gustan e que tanto disfrutades, xa que aparece nela moita xente coñecida. Trátase do enlace de Francisco Gómez Juste e Rosa Álvarez González que se celebrou, como podedes comprobar, na Igrexa de San Francisco no ano 1950.

A foto é propiedade de Antonio Canitrot Gómez, que como podedes observar levou moito traballo para tratar de numerar e identificar ós seus protagonistas. De entre tódolos asistentes el identificou ós seguintes:

3-Maruja ¿?

9- Mª del Carmen Martínez Fariña

11-Berta Lemos Rodríguez (nora de Luisa Pérez Gómez)

12-Luisa Pérez Gómez

13-Concepción Morales Gómez

14-Raquel Pérez Gómez

16-Elisa Gómez Juste

17-Angeles Gómez Juste

18-Carmen Juste Pérez- "Palota" (Nai de Carmen)

19-Secundino Fariña Juste- "Machaco"

20-Jesús Gómez Juste "Chicho"

21-Rosa Alvarez Gónzalez (Noiva)

23-Francisco Gómez Juste "Paquito"

24-Benita Gómez Juste

28-Luisa Gómez Juste

30-Josefa Rionegro Fariña "Pepiña"

33-Jesús Pousa Candedo "Chucho"

34-Antonio Canitrot Méndez (home de Elisa Gómez Juste)

36 "O Cachetada" tio de Cesarito, xa que a súa muller era a irmá da nai de Cesarito, Maruja que é a que aparece có nº 3.

38-Cesarito (Capelán castrense residente na Cañiza e fillo de Maruja nº 3)

39-Isolina Rionegro Fariña "Sola"

40-Purificación Escudero Gómez- "Pura"

41-Mª del Carmen Escudero Gómez- "Nisa"

42-Jesús Pousa Gómez- "Chucho" (Falecido)

43-Amelia Martínez Fariña- "Mela"

44-Santiago Oscar Canitrot Gómez (Fillo de Elisa Gómez Juste e Antonio Canitrot Méndez)

45-Antonio Canitrot Gómez (Fillo de Elisa Gómez Juste e Antonio Canitrot Méndez)

46-Leonor Escudero Gómez- "Nora"

A ver si entre todos somos quen de recoñecer á xente que aínda non está identificada, seguro que teredes lembranzas dalgún deles, como me pasa a min có "Cachetada"(disculpade pero non lembro nin o seu nome nin os apelidos), que tiña a barbería na rúa Yáñez, penso que se chamaba "Salón Montevideo". Moitas veces me sentei nunha cadeira que tiña para nenos, era alta e de cor verde. Alí me cortaba o cabelo deixandome unha perreira impecable, case que trazada con tiraliñas, á moda daqueles anos e que hoxe os rapaces rexeitarían totalmente.

E que dicir da Mela da que xa falei noutras ocasións, coa súa tenda a carón da nosa casa. Enfín disfrutade da foto.




miércoles, 1 de septiembre de 2010

O Portal por Couto

Aquí estamos de novo, non pensedes que me esquecín do blog. Voltamos á carga con novas ilusións despois das vacacións estivais, pero terédesme que perdoar, xa que por motivos que non veñen ó caso, non vou poder poñer unha entrada diaria, como teño acostumado. Vai a ser un periodo curto de transición no principio deste mes, ata que todo se vaia normalizando.
Douvos a todos a benvida de novo, e como o mes de Setembro na vila é o mes das Festas do Portal, aproveitamos e poñemos hoxe este debuxo que de un modo moi artístico esboza a capela da nosa Virxe, da nosa Patroa. O autor é o noso colaborador Francisco Couto Gulín, que me envía unha serie de debuxos que reflicten pequenos recunchos e detalles da vila, e que pouco a pouco iredes vendo.
Disculpade e grazas a todos pola vosa fidelidade e paciencia.