O solar do Sanatorio

Cando recibín esta imaxe, recoñezo que estaba totalmente perdido, incluso dubidaba que fose da nosa vila, pero despois de darlle varias voltas, e facer algunha que outra consulta, desvelouse o misterio.

Efectivamente trátase dese solar que había fronte o Cine Río, facendo esquina coa Alameda, e por suposto a foto debe de ser anterior a 1960, xa que me parece que cara a ese ano debeu comenzar a construcción dese edificio, no que posteriormente, na primeira planta se instalaría o "Sanatorio Nuestra Señora del Portal", no que moitos ribadavienses fumos sempre moi ben atendidos por eses grandes profesionais como eran D. Enrique Pumar, D. Manuel Gómez, e D. Antonio Padrón sen esquecer á enfermeira que coido que se chamaba Mª Rosa e da cal non lembro os seus apelidos.
Se mirades atentamente a foto, veredes que neste solar se acumulan materiais de construcción, e incluso á esquerda hai como uns moldes de encofrados para facer columnas, polo que supoño que se estarían iniciándo as obras de edificación.